Sources

1. [S7762] , Recherche de la Noblesse de l'élection de Valognes en 1523
   Sergenterie de TOLLEVAST (...) d'Yvetot C’est la déclaration de généalogie de noblesse que baille et produict au greffe Jean d’Yvetot, fils Pierre, se disant personne noble devers le procureur du Roy nostre sire. Et premièrement Richard d’Yvetot, en son vivant escuier, professant et tenant une franche vavassorerie à Yvetot et illecques environ, descendoit anciennement par partages d'avecques le sieur et Roy d’Yvetot-en- Caux , et tenoit sa vavassorerie franchement du Roy nostre sire sans autre moien, à cause de laquelle il étoit patron collateur de l’église dud. lieu d’Yvetot [en Cotentin] avecques plusieurs belles franchises et libertés dont il a jouy tout son temps. Et eust à femme damoiselle Aliénor de Quierqueville, et eurent ensemble 4 filz et une fille, desquels quatre fils, deux furent départis d’héritages à Bohon et illecques environ, et les deux autres, et Jeanne, leur sœur, furent partagés à Yvetot et environs. Desquels susdits derniers fils de Richard fut Thomas d’Yvetot, escuier, qui tint tout son temps lad. vavassorie et patronage d’Yvetot, avecques une franche sergenterie nommée le franc-lieu de la Forest mixte de Martinvast, avec ses dignités et appartenances. Et eut led. Thomas pour femme et espouse damoiselle Thomasse, fille du sieur de Cartot, près St-Sauveur. Et eurent plusieurs filz, dont Jean d’Yvetot, qui tint tout son temps la vavassorerie d’Yvetot avec le patronage. Et eut à femme damoiselle Guillemette, fille de Pierre Martin, escuier, et d’une veuve du Val de Vire, fille de Robert de Byon et sœur de Jean de Byon, chevalier ; dont dud. Jean et de lad. Guillemette, son espouse, vinrent 3 filz et des filles ; l’aisné fut Thomas d’Yvetot, lequel suivit et fréquenta les armes tout son temps, fut en Bretaigne à la bataille du Roy, et là fut prisonnier un long temps et longuement demeura et conversa avec le sire de Siffrevast [Chiffrevast] et oncques ne fut avec les Navarrais qui occupoient lors le païs . Et le second filz fut Jean d’Yvetot qui longuement demeura avec le sire de Siffrevast, lors cappitaine de Vallongues, auquel lieu de Vallongnes il fut prins par les Anglais et mené à Cherbourg prisonnier longuement. Et le tiers filz fut Guillaume d’Yvetot, lequel, en son jeune âge, fut, avecques son dit frère, au chasteau de Vallongnes ; et comme le noble Roy Charles, à qui Dieu pardonne, voulut aller en Flandre châtier la rébellion des Flamands, et suffisamment y aller avec des chevaliers et autres gens de guerre, là ledit Guillaume souffrit grandes pertes et dommages. Et après qu’il put nourrir et avoir enfans qui pussent suivre les guerres, il monta et arrima bien suffisamment Richard d’Yvetot, l’aisné de ses filz et le plus fort, lequel suivit les guerres et fut en plusieurs voyages comme à Arras et ailleurs ; et fut à Cherbourg en la garnison jusques à ce que les Anglais eurent quitté le païs. Duquel Richard sortit Jean d’Yvetot, escuier, son filz aisné, et Jouennet d’Yvetot. Lequel Jean 'l’aisné eut pour en fi an s Pierre et Robert dictz d’Yvetot ; duquel Pierre et de damoiselle Aline de Durescu, son espouze, sont sortis Jean, Ollivier, et François, ditz d’Yvetot. Et dudit Robert et de damoiselle Marye le Fort est sorty Jean d’Yvetot, à présent archer en la garnison de Cherbourg. Lesquels d’Yvetot tiennent le franc lieu de la Forest mixte de Martinvast. Et d’icelluy Jouennet, fils cadet dud. Richard, est sorti Jean d’Yvetot; et dud. Jean et de damoiselle Allichon Blondel, du sieur de la Londe, sortirent Guill. et Robert d’Yvetot ; et d’ioelluy Robert et de dlle Guillemette du Praël, fille du sieur de Hiéville, sont sortis Gaultier et Pierre d’Yvetot, escuiers. Produisant tous lesd. d’Yvetot devers le procureur du Roy, les jour et an dessusditz. [Et portent pour armés lesd. d’Yvetot : d’azur à la bande d’argent accostée de 2 coquilles d’or], (...) , Voir source